Skelfileg sjón blasti við Nick Lestina, íbúa í bænum Bagley í Iowa í Bandaríkjunum, þegar hann kom heim til sín þann 3. október síðastliðinn. Blóð, fita og annar ófögnuður fyllti kjallarann á heimili fjölskyldunnar sem hefur nú verið úrskurðað óíbúðarhæft – tímabundið að minnsta kosti.
Þannig er mál með vexti að í næsta húsi við Nick og fjölskyldu hans er sláturhús þar sem nautgripum og svínum er meðal annars slátrað. Lagnir húsanna eru samtengdar og virðist stífla hafa gert það að verkum að blóð, fita og líkamsvefir sulluðust upp úr niðurfallinu á heimili Nicks – og það ekki í neinu smámagni.
Nú þegar hálfur mánuður er liðinn síðan Nick varð fyrst var við lekann vellur enn upp úr niðurfallinu. Í frétt Des Moines Register kemur fram að heilbrigðiseftirlitið í Iowa hafi metið húsið óíbúðarhæft, á meðan ekki hefur tekist að koma í veg fyrir lekann. Sú vinna stendur yfir en verkefnið er ýmsum vandkvæðum bundið.