Borgaryfirvöld í Melbourne í Ástralíu hafa nú bannað reykingar utandyra í miðborginni og lagt sektir við að henda sígarettustubbum á götuna. Sektin getur numið sem svarar allt að 50.000 íslenskum krónum.
Bannið tók gildi á föstudaginn. Samkvæmt því verða þeir, sem eru staðnir að reykingum á bannsvæðinu, sektaðir um sem svarar til um 10.000 íslenskra króna. Bannið nær til gangstétta og gatna á svæðinu við Bourke Street verslunarmiðstöðina sem er vinsælasta verslunarsvæðið í miðborginni.
Bannið nær ekki til rafretta en borgarstjórn íhugar nú hvort það eigi einnig að ná til þeirra.
Bannið við að henda sígarettustubbum frá sér gildir um alla borg.