Bandaríska alríkislögreglan, FBI, hefur svipt hulunni af gögnum um Hugh Hefner, stofnanda Playboy. Hefner lést í september 2017, 91 árs að aldri, en hann stofnaði þetta vinsæla tímarit árið 1953.
Playboy-tímaritið vakti mikið umtal á sínum tíma enda innihélt það nektarmyndir af konum í bland við smásögur og fréttagreinar.
Það voru einmitt nektarmyndirnar sem voru tilefni þess að FBI skoðaði Hefner á sjötta og sjöunda áratug síðustu aldar. Fulltrúar FBI ræddu nokkrum sinnum við hann og lék grunur á að hann væri að brjóta lög með því að dreifa klámfengnu efni.
Í einu skjalinu er til dæmis vitnað í minnisblað J. Edgar Hoover, fyrsta forstjóra FBI, sem mælti með því að Hefner og ljósmyndarinn Edward Oppman yrðu settir undir sérstakt eftirlit. Var tilgangurinn að fylgjast með því hvort þeir brytu alríkislög með dreifingu klámefnis milli ríkja Bandaríkjanna. Í einu skjalinu kom fram það álit að Hefner væri „of snjall“ til að brjóta lög.
Hefner var þó áfram undir vökulum augum FBI og saksóknara og var hann til að mynda sóttur til saka í Chicago fyrir „klámfengnar“ myndir sem birtust af leikkonunni Jayne Mansfield. Hefner var þó aldrei dæmdur vegna þeirra enda gátu kviðdómendur ekki komið sér saman um sekt eða sakleysi.
Áhugasamir geta kynnt sér skjölin hér.
