Bill Gates, stofnandi Microsoft, hefur mörg undanfarin ár verið á toppnum yfir ríkustu einstaklinga heims. Gates hefur verið duglegur í fjárfestingum á undanförnum árum og áratugum en hann segir að ein tiltekin fjárfesting hafi að líkindum verið sú besta.
Gates hefur verið einna duglegastur auðmanna heims að láta peninga renna til góðra málefna. Í gegnum sjóð sem hann og eiginkona hans, Melinda, stofnuðu hafa þau látið tíu milljarða dala renna til góðgerðarmálaefna af ýmsu tagi. Þetta hafa þau hjónin gert í gegnum sjóð sinn, Bill & Melinda Gates Foundation.
Í grein sem Bill Gates skrifaði í Wall Street Journal á dögunum skrifar hann um sjóðinn og bendir á að milljarðarnir tíu hafi runnið í nokkra undirflokka, þar á meðal Gavi-samtökin sem barist hafa fyrir því að lokka verð á nauðsynlegum bólefnum í þróunarlöndunum. Þá hafa peningarnir runnið í fleiri sambærileg verkefni sem meðal annars miða að því að auka aðgengi fólks að bóluefnum.
Í grein sinni bendir Bill Gates á að ef milljörðunum tíu hefði verið fjárfest með öðrum hætti, til dæmis með S&P 500-vísitölunni hefði ávöxtunin verið á bilinu 12 til 17 milljarðar dala. En útreikningar Copenhagen Concensus Center benda til þess að með þeirri leið sem sjóðurinn fór hafi ávöxtunin verið nærri 200 milljarðar dala.
„Þessir tíu milljarðar dala hafa aukið aðgengi fólks að bólusetningum, lyfjum, flugnanetum gegn moskítóflugum og öðrum nauðsynlegum hlutum í þróunarlöndunum,“ sagði Bill í greininni og bætti við að ávinningurinn væri gríðarlegur. Ástæðan væri í raun einföld. „Þetta hefur skilað sínu því þegar fólk er ekki veikt getur það sinnt vinnu sinni og farið í skólann,“ sagði hann.
