Þegar Daniel Nicolai Guldberg, 43 ára, lá á bráðamóttöku háskólasjúkrahússins í Haukeland í Noregi þann 15. október hringdi hann bjöllunni margoft til að fá aðstoð starfsfólks en enginn kom. Þegar loksins var litið til hans var hann látinn og hafði legið í eina og hálfa klukkustund án þess að fá aðstoð eða að litið væri inn til hans. Samkvæmt vinnureglum á hjúkrunarfræðingur að líta inn til sjúklinga á hálfrar klukkustundar fresti. Hjúkrunarfræðingar á sjúkrahúsinu höfðu 134 sinnum á árinu gert stjórn sjúkrahússins viðvart um að álagið væri of mikið og að undirmannað væri.

Norska ríkisútvarpið skýrir frá þessu. Haft er eftir Hans Fredrik Iversen, trúnaðarmanni hjúkrunarfræðinga á sjúkrahúsinu, að það sé bara hægt að teygja ákveðið langt á peysu áður en hún slitnar og það hafi kannski verið það sem gerðist í þessu tilfelli, hjúkrunarfræðingarnir hafi ekki komist yfir meira. Iversen hefur starfað á bráðamóttökunni í þrjú og hálft ár og segir að undirmönnum hafi verið stórt vandamál á þessum tíma og hafi farið versnandi undanfarin tvö ár.

Bæði læknar og hjúkrunarfræðingar hafa varað stjórnendur sjúkrahússins við undirmönnum undanfarin tvö ár án þess að gripið hafi verið til ráðstafana. Það eru því stjórnendur sjúkrahússins en ekki starfsfólkið sem er gagnrýnt í skýrslu fylkislæknisins, sem er æðsta yfirvald heilbrigðismála í fylkinu, um andlát Daniel og hann mælir með að lögreglurannsókn verði hafin á málinu.