Landsréttur kvað fyrir um viku upp úrskurð í máli sem varðar rannsókn á síma manns sem er grunaður um aðild að ráni, frelsissviptingu, stórfelldri líkamsárás og kynferðisbroti. Héraðsdómur Reykjaness hafði 29. september veitt Embætti lögreglustjórans á höfuðborgarsvæðinu heimild til að rannsaka rafrænt innihald síma mannsins, sem hald hafði verið lagt á. Héraðsdómur komst að þeirri niðurstöðu að embættinu væri þetta heimilt og áfrýjaði maðurinn þeirri niðurstöðu til Landsréttar sem hefur nú úrskurðað að niðurstaða Héraðsdóms skuli standa.
Fellst Landsréttur á þau rök Lögreglustjórans á höfuðborgarsvæðisins að ástæða sé til að ætla að upplýsingar sem skipt geti miklu fyrir rannsókn málsins geti fengist með því að rannsaka rafrænt innihald símans.
Með dómi Landsréttar fylgir dómur Héraðsdóms Reykjaness í málinu og þar er málavöxtum lýst nánar. Nokkrir aðilar eru grunaðir um aðild að þeim brotum sem til rannsóknar eru í málinu
Brotaþoli, sem ekki verður betur séð af samhengi úrskurðarins en að sé karlmaður, greindi frá því í skýrslutöku hjá lögreglu að 14. ágúst síðastliðinn hafi maður, sem nefndur er Y í úrskurðinum, boðið sér á rúntinn. Það hafi brotaþolinn þegið og Y þá sótt hann. Brotaþolinn settist í aftursæti bílsins, Y ók en eigandi símans sem umræddur úrskurður snýst um og kallaður er X sat í farþegasætinu við hlið bílstjórans.
Brotaþolinn segir mennina hafa sagt sér að afklæðast. Þeir hafi síðan tekið skóna hans, úr, síma og eyrnalokka. Hann hafi verið á nærbuxunum einum fata og mennirnir hafi lamið hann með járnröri, kúluhamri og venjulegum hamri. Brotaþolinn segist hafa verið laminn á ristarnar og hafi sett hendurnar yfir fæturna á sér til að verjast höggunum en hafi þá fengið högg í andlitið. Hann tjáði lögreglu að hann hefði verið laminn með hamri í andlitið. Eftir það hafi mennirnir sagt sér að fara úr nærbuxunum og þeir hafi tekið járnrörið og reynt að stinga því upp í endaþarminn á honum.
Þá hafi brotaþolinn heyrt hávaða, einhver hafi slegið í eitthvað og hrópað. Við það hafi komið styggð að mönnunum og þeir hafi farið upp í bifreiðarnar og ekið á brott. Hafi einn úr hópnum tekið árásina upp á símann sinn. Brotaþolinn vissi hvorki hver það var sem tók aðfarirnar upp né hvort myndskeiðið væri komið í dreifingu.
Í úrskurðinum segir að það sé upplifun brotaþola að árásin hafi verið skipulögð og hann leiddur í gildru. Málið snúist um að hann hafi sofið hjá fyrrverandi kærustu X, eiganda símans sem lögreglan hefur nú fengið leyfi Landsréttar til að rannsaka, og hefna hafi átt fyrir það.
Enn fremur kemur fram að X sé undir rökstuddum grun lögreglu um að vera einn af þeim sem hafi skipulagt árásina og sé sá aðili sem sé að taka upp árásina en lögregla sé með myndband af árásinni undir höndum. Í skýrslutöku hjá lögreglu þann 30. ágúst síðastliðinn voru X sýnd tvö myndbönd af umræddri árás, myndbönd úr síma Y, þess sem sótti brotaþolann, sem voru send til hans frá SnapChat notanda með sams konar notandanafn og nafn X.
Eigandi símans, X, sagðist hins vegar ekkert kannast við þetta og sagðist ekki vera sá sem væri að tala inn á upptökuna. Aðspurður sagðist hann vera kallaður „X“ á SnapChat en sagðist hafa týnt síma sínum í miðbæ Reykjavíkur en gat ekki gert nánari grein fyrir því.
Í úrskurðinu segir að við rannsókn málsins hafi lögreglan greint símagögn sem hafi leitt í ljós að símanúmer sem skráð er á X hafi tengst símasendum sem eru nálægt þeim vettvangi þar sem umrædd ofbeldisbrot áttu sér stað. Lögreglan telji mikilvægt að fá afrit af öllum símagögnum X þar sem rökstuddur grunur sé um að hann eigi hlut að máli sem og til að upplýsa hlut hvers og eins aðila sem grunaður er um aðild að þeirri frelsissviptingu, ráni, kynferðisbroti og stórfelldu líkamsárás sem til rannsóknar er.
