Nú situr Olesya heima hjá móður sinni. Hún er með staðsetningarbúnað á öðrum ökklanum og húðflúr af Pútín á hinum, þó ekki húðflúr sem Pútín hugnast því það sýnir andstöðu hennar við hann.
CNN skýrir frá þessu og segir að ástæðan fyrir að Olesya er nú flokkuð sem hryðjuverkamaður sé að hún birti myndband á Instagram í október um sprenginguna á brúnni til Krím frá meginlandi Rússland og um leið gagnrýndi hún innrás Rússa í Úkraínu.
Hún er einnig sökuð um að hafa skrifað gagnrýna texta um rússneska herinn í spjallhópi rússneskra stúdenta á rússneska samfélagsmiðlinum VK.
Lögmaður hennar sagði í samtali við CNN að hún eigi allt að þriggja ára fangelsi yfir höfði sér en þar sem hún sé nú skilgreind sem hryðjuverkamaður geti það orðið henni til refsiþyngingar og kostað hana sjö ár í fangelsi. Hann sagðist þó vonast til að hún sleppi með sekt.
En móðir hennar, Natalya, er ekki bjartsýn og sagðist telja að yfirvöld vilji nota mál hennar til að slökkva í þeirri andstöðu sem kraumar undir í héraðinu. „Ríkisstjórnin grípur til undarlegra aðgerða. Glæpamenn eru fengnir til að fara í stríð á sama tíma og börn eru sett í fangelsi,“ sagði hún.
