Í kvöldfréttum RÚV á laugardaginn síðastliðinn var fjallað um afmyndaða eldislaxa úr kvíum Arctic Fish en kajakræðarinn Veiga Grétarsdóttir vakti fyrst athygli á málinu. Hún var þá á bát sínum í Arnarfirði og Dýrafirði þegar hún sigldi framhjá kvíunum.

Hún tók myndskeið af fiskunum þar sem mátti sjá einhverja af þeim ansi afmyndaða eftir að hafa særst og nuddast við netin í kvíunum. Daníel Jakobsson, starfsmaður Arctic Fish og formaður bæjarráðs Ísafjarðarbæjar, hafði samband við Veigu símleiðis og gagnrýndi hana fyrir að hafa farið með myndskeiðið til fjölmiðla. Veiga greindi sjálf frá þessu símtali við Stundina í gær.

Í dag sendi Arctic Fish yfirlýsingu á Bæjarins besta, vestfirskan fjölmiðil, þar sem Veiga er sökuð um að hafa brotið sóttvarnarlög varðandi sjókvíaeldi.

„Enginn atvinnurekstur á Íslandi býr við jafn stranga eftirlitsumgjörð og fiskeldi og allar úttektir eftirlitsaðila og ástand á eldisstæðum eru öllum aðgengilegar á heimasíðu MAST. Starfsfólk Arctic Fish vinnur að því alla daga að bæta heilbrigði og velferð eldisfiska okkar og það er okkar markmið að engir fiskar ættu að þurfa að líða. Það er hinsvegar þannig, þegar verið er að ala milljónir fiska á ári, þá eru fiskar sem verða undir af ýmsum ástæðum. Með öflugu gæðakerfi, daglegu eftirliti í kvíunum þar sem að veikburða fiskar eru teknir út og með stórum kvíum þar fiskarnir okkar hafa gott pláss, tryggjum við velferð okkar fiska eftir fremsta megni. Jafnframt áréttar félagið að óheimilt er að fara í eldiskvíar fiskeldisfyrirtækja án leyfis. Er það meðal annars vegna sóttvarna því mikilvægt er að bera ekki hugsanlegar sýkingar á milli fjarða og eldissvæða. Þeir sem hafa áhuga á að koma og skoða starfsemi okkar er velkomið að hafa samband. Fram að þessu hafa allir sem þess hafa óskað fengið að koma og sjá starfsemi á eldisstöðvum okkar.“

Þess má geta að Arctic Fish var einn styrktaraðila Veigu þegar hún sigldi hringinn í kringum landið á kajak fyrst kvenna og fyrst allra til að klára hringinn rangsælis.

Margir hafa áhyggjur af hvernig er staðið að sjókvíalaxeldi og segja sumir að af henni stafi sjónmengun og umhverfismengun.