„Ég held að það myndi enginn meiðast af því að aflýsa Þjóðhátíð. Ósköp einfaldlega vegna þess að á þessum stöðum þar sem menn drekka áfengi þá minnka hömlur og þegar hömlur minnka verða meiri og meiri líkur á þeirri tegund samskipta sem getur leitt til smits,“ segir Kári Stefánsson í viðtali við vef Fréttablaðsins í dag.
Í viðtalinu segir Kári að með vaxandi fjölda smita komi að því að smit berist í þá sem eru veikir fyrir og telur að 0,5% þeirra sem smitist muni þurfa að fara á spítala. Hlutfall óbólusettra sem smitast af Covid og veikjast alvarlega sé hins vegar 5%.
Kári bendir á að bólusetning sé fremur vörn gegn veikindum en smiti. Hin mikla fjölgun smita sem nú á sér stað hafi verið fyrirsjáanleg í ljósi þess að öllum takmörkunum var aflétt. „Staðreyndin er sú að við lifum í opnu samfélagi núna og það er ljóst að bólusetningin veitir meiri vörn gegn því að verða lasinn þegar þú sýkist heldur en vörn gegn því að sýkjast. Þannig þetta er í sjálfu sér ekkert á svig við þann raunveruleika sem við hljótum að hafa reiknað að einhverju leyti með.“
Kári segir koma til greina að taka upp grímuskyldu á ný, loka börum og aflýsa útihátíðum.