Kristni H. Gunnarssyni, fyrrverandi alþingismaður, blöskrar umræðan um kjaramál Agnesar Sigurðardóttur biskups eftir að hún fékk ríflega launahækkun hjá Kjararáði. Eins og flestir vita hækkuðu laun embættis biskups um rúmlega 20 prósent, afturvirkt til eins árs. Fékk hún því rúmlega þriggja milljón króna eingreiðslu. Þá hefur mikið verið til umræðu að hún greiði aðeins 90 þúsund króna leigu af næstum 500 fermetra embættisbústað sínum á Bergstaðastræti.
Kristinn slengir fram nýju myllumerki á Facebook, #youtoo, og beinir spjótum sínum að fjölmiðlum í þessu sambandi. Sérstaklega Fréttablaðinu, sem hann telur að hafi lagt biskup Íslands í „þrálátt og yfirgengilegt einelti“. „Þið líka“ segir Kristinn.
Samkvæmt Kristni hefur biskup ekki notið sannmælis miðað við aðra embættismenn og nefnir hann að ástæðan sé að biskup sé kona. Hann segir: „Spurningin um það hver launin eiga að vera getur ekki með neinni sanngirni verið beint að biskupi einum. Laun biskups eru svipuð og ákveðins hóps embættismanna og þó frekar heldur lægri. Það er sérstaklega ómaklegt og ósanngjarnt í þessari umræðu að vega að biskupi.“
Agnes hefur verið gagnrýnd fyrir að sækja sjálf um endurskoðun kjara hjá Kjararáði haustið 2015. Hefur hún verið sökuð um græðgi í því samhengi og miklar umræður skapast á síðu Kristins. Hann segir: „ Allir embættismenn sem voru lækkaðir í launum eftir hrunið hafa sótt hækkun aftur og fengið. Það að leggja einn þeirra í einelti og saka um græðgi og annað fleira er hvorki málefnalegt né sanngjarnt. Það er eitthvað annað sem hangir á spýtunni.“
Um það að biskup hafi fengið afturvirka hækkun segir Kristinn: „Það sýnist mér vera mest gagnrýnt að biskup hafi fengið launahækkunina afturvirkt. Þá er að lesa úrskurð Kjararáðs. Þar kemur ekki fram hvers vegna svo er. En erindi biskups er frá maí 2015. Svo úrskurðurinn er rúmum tveimur árum síðar. kannski er afturvirknin til þess að bæta fyrir seinaganginn hjá Kjararáði.“ Bendir hann á að afturvirkni sé regla frekar en hitt hjá Kjararáði og nefnir til dæmis úrskurði ráðsins í sumar um kjör sendiherra, hagstofustjóra, ríkisendurskoðanda og fleiri hópa.
„Þá er spurningin : af hverju þegja fjölmiðlar yfir þessu?
Af hverju vega þeir allir að biskup?
Af hverju er þetta einelti gagnvart biskup?
Því verða þeir að svara, en það er mín ágiskun að þeir séu markvisst og meðvitað að ráðast gegn þjóðkirkjunni og vilji veikja hana.“
Kristinn lætur það ekki duga að verja biskup á sinni eigin Facebook síðu. Eins og riddari stígur hann fram á bloggi Egils Helgasonar þar sem embættisbústaður biskups er borinn saman við Bessastaði en forseti borgar ekki leigu af sínum bústað. „Góður punktur með forsetann og Bessastaði. Ekki nokkur fjölmiðlamaður sem þessa daganna hamast á biskupnum sér neina samsvörun við forsetann. Er það vegna þess að biskupinn er kona en forsetinn karl?“
