Jóhann Már Helgason, sparkspekingur með meiru, var gestur í nýjasta þætti af Íþróttavikunni á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Á dögunum varð það ljóst að Sara Björk Gunnarsdóttir, fyrrum landsliðsfyrirliði, yrði ekki áfram í röðum Juventus en samningur hennar er að renna út. Hún var áður hjá Lyon og Wolfsburg og hefur átt frábæran feril.

„Ég sé hana ekki fara í enn eitt stórliðið á þessum aldri. En það eru örugglega fullt af stórliðum þarna úti sem vilja fá hana. Ég sé fyrir mér eitthvað skemmtilegt múv úti eða þá að hún komi bara heim. Þá myndi ég halda að hún kæmi í Val,“ sagði Hrafnkell um næstu skref Söru, sem verður 34 ára í haust.

Valsarinn Jóhann myndi taka Söru opnum örmum á Hlíðarenda.

„Ég myndi bjóða hana hjartanlega velkomna í Val. Það væri líka í takti við það sem er í gangi. Gylfi í karlaliðinu og Sara í kvennaliðinu. Það væri bara frábært. En kannski vill hún taka einn samning í viðbót úti. Maður veit ekki hvar hennar metnaður liggur og svo framvegis. En það væri mjög gaman að fá hana í deildina hér heima.“