Ævintýramyndin Solo: A Star Wars Story hirti toppsæti aðsóknarlistans af Deadpool 2, bæði Íslandi og í Bandaríkjunum en náði hvorki að væntingum spámanna né framleiðenda.
Myndin var frumsýnd víða um heim síðustu helgi og halaði inn 83 milljónir bandaríkjadollara vestanhafs en alls 148 milljónir á heimsvísu. Sérfræðingar segja tölurnar ágætar en markar þetta lægstu opnun myndabálksins frá upphafi.
Solo: A Star Wars Story segir söguna af yngri árum hetjunnar Han Solo, sem í áraraðir var leikinn af Harrison Ford. Að þessu sinni er það Alden Ehrenreich sem hefur tekið við keflinu og kynnist hetjan góðkunnum persónum á borð við Chewbacca, Lando Calrissian og fleirum.
Talið er að framleiðendur Disney og Lucasfilm hafi gert ráð fyrir rúmlega 100 milljón dollara opnun í heimalandinu einu. Myndinni gekk betur í Bandaríkjunum heldur en í Evrópu og Kína en á talsvert eftir í land til að mæta auglýsinga- og framleiðslukostnaði, sem nemur um rúmum 350 milljónum. Á Íslandi voru tæplega 7 þúsund manns sem sáu myndina fyrstu dagana.
Kvikmyndin Kona fer í stríð eftir Benedikt Erlingsson var einnig frumsýnd á miðvikudaginn og lenti í fjórða sæti íslenska aðsóknarlistans, á eftir Deadpool 2 og fjölskyldumyndinni Charming sem var einnig frumsýnd sömu helgi. Alls hafa nú um 2500 manns séð nýjustu kvikmynd Benedikts en hún var afhjúpuð hérlendis þann 22. maí og hefur hlotið frábærar viðtökur gagnrýnenda og áhorfenda.
