Jackie Chan sem löngu er orðinn heimsfrægur fyrir leik sinn í hasarmyndum, í bæði Hong Kong og Bandaríkjunum, mun síðar á árinu stíga nýtt skref á ferlinum, sem kann að koma mörgum sem þekkja helst til hans sem hasarmyndastjörnu á óvart, en hann mun leikstýra uppsetningu á hinni sígildu óperu Turandot eftir ítalska tónskáldið Giacomo Puccini.

Breska útvarpsstöðin Classic FM, sem sérhæfir sig í sígildri tónlist, greinir frá þessu.

Þetta er í fyrsta sinn sem Chan leikstýrir uppsetningu á óperu en hann hefur leikstýrt á annan tug kvikmynda.

Um er að ræða opnunarsýningu á sérstakri Puccini-hátíð sem fram fer í 72. sinn, í bænum Torre Del Lago, í Toscana- héraði á Ítalíu, í júlí næstkomandi. Puccini dvaldi langdvölum í bænum og samdi mörg verka sinna þar.

Chan mun setja sinn svip á hið sígilda verk en hinar kínversku bardagalistir Tai Chi og Kung Fu munu skipa sinn sess í sýningunni en eins og kunnugt er koma bardagalistir fyrir í mörgum ef ekki flestum kvikmyndum Chan.

Kína er einmitt sögusvið Turandot en óperan er sú síðasta sem Puccini samdi áður en hann lést árið 1924. Verkinu var þá reyndar ólokið en Franco Alfano, landi Puccini, lauk við óperuna.

Alþjóðlegur hópur óperusöngvara fer með hlutverk í uppsetningu Chan en einna þekktastur í hópnum er fransk-ítalski tenórinn Roberto Alagna en hann hefur verið í aðalhlutverkum í öllum helstu óperuhúsum heims.

Á Facebook-síðu Classic Fm grípa sumir til þess að hæðast að þessu nýja hlutverki hasarmyndastjörnunnar. Í einni athugasemd er hins vegar bent á að Jackie Chan stundaði á sínum yngri árum nám við leiklistarakademíu Kína og að ópera hafi verið hluti af náminu.

Ljóst er þó að margir eru hissa en meðal þeirra er íslenskur áhugamaður um sígilda tónlist sem segist á samfélagsmiðlum ekki hafa haft hugmynd um þennan óperuáhuga hasarmyndastjörnunnar.