Heimilisköttur í Nýja Sjálandi hefur fengið viðurnefnið Leonardo da Pinchy, eða Hnuplarinn Leónardó, eftir að upp komst að hann er búinn að vera að laumast inn til nágrannans og stela nærfötum. Hefur hann stolið um 150 gripum.
Fréttastofan UPI greinir frá þessu.
Umræddur köttur heitir í raun Leó og er um fjórtán mánaða gamall fress af Tonkin-kyni. Snemma beygist krókurinn því að sögn eiganda hans, Helen North, hefur Leó hnuplað um 150 gripum á undanförnum níu mánuðum. Það er frá því að hann var aðeins kettlingur.
„Hann kemur heim með fullt af hlutum. Hann gerir ekki mikið við þá eftir að hann er kominn með þá inn, hann skilur þá bara eftir á gólfinu og heldur svo áfram að stússa eitthvað,“ sagði Helen í útvarpsþætti hjá Radio New Zealand.
Að sögn Helen hefur Leó stolið alls kyns hlutum og er ekki sérstaklega vandlátur þegar kemur að þýfi. En hann er sérstaklega heillaður af nærfötum og sokkum, einkum nærfötum af karlmönnum.
„Virkilega dýr treyja með verðmiðanum í, mjúkir bangsar, fullt af nærbuxum og sokkum, garðhandskar, hattar, íþróttabrjóstahaldarar, stuttbuxur, ruðningssokkar, landsliðstreyja í ruðningi… í raun hvað sem er,“ sagði hún aðspurð um hvers lags þýfi Leó kæmi með heim í fylgsni sitt.
Það er líka ekki sama hvenær Leó stundar sína myrku iðju. Laugardagar og sunnudagar eru afkastamestir hjá þjófnum því þá eru flestar flíkur hangandi á snúrum í görðunum í nágrenninu. En Leó vílar heldur ekki fyrir sér að fara inn í hús nágrannana og taka hluti.
„Fyrir utan það, þá er hann kettlingur – Hann ræðst á allt, bítur þig og vekur þig um miðja nótt,“ sagði hún.
Sagði hin meðvirki aðstandandi hins kleptómaníska kattar að hún reyndi hvað hún gæti að skila þýfinu. Er hún búin að stofna Whatsapp og Facebook grúbbur þar sem hún auglýsir gripina. Í dag er hún með um 60 stolna hluti í körfu sem hún veit ekki hver á. Grunar Helen að Leó sé í auknum mæli farinn að stela úr húsum lengra í burtu eftir því sem hann eldist.
Sumir þeirra eru mjög stórir, eins og einn eins og hálfs metra langur leikfangasnákur sem Leó dró heim einn daginn. Og reyndar annan dag líka.
„Hann kom tvisvar sinnum heim með þetta þannig að honum líkaði augljóslega mjög vel við það,“ sagði Helen.
