Breska krúnan greindi frá því í gær að Karl hefði greinst með krabbamein og er óhætt að segja að varla hafi verið rætt um annað í breskum fjölmiðlum.
Sjá einnig: Karl Bretakonungur greindur með krabbamein
Karl gekkst undir aðgerð á dögunum vegna góðkynja stækkunar á blöðruhálskirtli og kom þá í ljós að hann glímir við krabbamein. Góðu fréttirnar eru þær að meinið virðist hafa greinst snemma þó óljóst sé á þessari stundu af hvaða tegund það er.
Grunnt hefur verið á því góða á milli bræðranna Vilhjálms og Harry að undanförnu og hefur fjölskyldan í raun logað í illdeilum. Harry er á leið til Bretlands frá Bandaríkjunum til að hitta föður sinn og greindu breskir fjölmiðlar frá því í gær að eiginkona hans, Meghan Markle, yrði heima með börnum þeirra.
Fitzwilliams segir við Daily Mail að stundum geti erfiðar fréttir stuðlað að því að ættingjar nái sáttum í þungum deilumálum sem geta virst óyfirstíganleg.
„Fréttirnar um að Karl glími við krabbamein eru áfall. Það er eðlilegt að Harry vilji vera nálægt honum og það er líka snjallt af honum að koma einn vegna deilna innan fjölskyldunnar. Harry mun, þrátt fyrir allt sem á undan er gengið, óska þess að faðir hans fái skjótan bata.“
Fitzwilliams bendir á að eiginkona Vilhjálms, Katrín, sé sjálf að jafna sig eftir aðgerð og því fái þeir feðgar tíma til að fara yfir málin. „Við skulum vona að þessi fundur stuðli að bjartari framtíð fyrir konungsfjölskylduna,“ segir Richard Fitzwilliams.
Aðrir sérfræðingar í málefnum fjölskyldunnar eru einnig vongóðir um að tíðindin verði til þess að bræðurnir grafi stríðsöxina. Jennie Bond, sem skrifaði um fjölskylduna fyrir BBC lengi vel, segist vona að veikindin séu „blessun í dulargervi“ eins og hún orðar það. „Kannski, loksins, verður þetta til þess að sættir nást.“
