Stórleikarinn Leonardo di Caprio, 48 ára, er sagður genginn út og þykir það sæta nokkrum tíðindum. Di Caprio er einn þekktasti glaumgosi heims og ástarsambönd hans vara yfirleitt stutt. Það hefur þó breyst en sú heppna er ítalska fyrirsætan Vittoria Ceretti sem er líka á fullkomnum aldri fyrir di Caprio eða 25 ára gömul.
Parið hóf að stinga saman nefjum í ágúst en þá var greint frá stefnumóti þeirra sem vakti mikla athygli.
Síðan hafa hlutirnir þróast hratt og er di Caprio sagður hugfanginn af Ceretti. Hafa þau sérstaklega náð vel saman varðandi umhverfisvernd en fyrirsætan er loftslags aktívisti og hittir þar di Caprio í hjartastað. Leikarinn ferðast nefnilega á einkaþotu sinni heimshorna á milli til þess að predika um loftslagsmál.
Daily Mail fjallar um sambandið og birtir myndir af parinu þar sem þau virðast mjög ástfangin. „Hún er mjög gáfuð og er með alla þá kosti sem di Caprio leitar í maka,“ hefur blaðið eftir viðmælanda sem þekkir til parsins.
Fróðlegt verður að sjá hvort sambandið endist en Ceretti verður 26 ára í júní á næsta ári þannig að einhver tími er til stefnu.
