Stjörnutorgi í Kringlunni var formlega lokað í nóvember síðastliðinn þegar allri þriðju hæðinni var breytt í Kúmen, sem verður svæði veitinga, upplifunar og skemmtunar.

Við það tilefni bauð Kringlan merki Stjörnutorgs á uppboði og var allur ágóði ánafnaður pakkasöfnun Kringlunnar til styrktar Mæðrastyrksnefnd og Fjölskylduhjálp Íslands.

Það var fyrirtækið Tæknivörur sem tryggði sér skiltið og mun færa Íþróttafélagi Stjörnunnar í Garðabæ skiltið. Þar verður merkið sett upp á torgi Stjörnumanna og mun því Stjörnutorg lifa áfram á nýjum stað.

Upphæðin, 200.000,- krónur rennur óskipt í pakkasöfnunina. Það voru jólaálfar Kringlunnar ásamt markaðsstjóra Kringlunnar, Baldvinu Snælaugsdóttur, sem tóku þakklát við styrknum og afhentu um leið skiltið góða. Jólaálfar Kringlunnar skottast í verslanir í Kringlunni og kaupa gjafir handa börnum sem á þurfa að halda. Pakkasöfnun Kringlunnar fer þannig fram að viðskiptavinir eru hvattir til að kaupa eina aukagjöf og setja hana í söfnunina við jólatréð í Kringlunni.  Eins er hægt að styrkja söfnun með framlagi á kringlan.is. Jólaálfarnir kaupa gjafar fyrir börnin fyrir allt sem safnast á kringlan.is.

Pakkasöfnun um 30% minni en í fyrra

Pakkasöfnunin hófst í byrjun desember og hafa margir lagt henni lið. Að sögn Baldvinu er söfnun þó töluvert dræmari en í fyrra eða um það bil 30% minni. Er það áhyggjuefni þar sem síst færri fjölskyldur reiða sig á aðstoð hjálparsamtaka um þessi jól. Vill Baldvina benda á að framlög á kringlan.is þurfa ekki að vera há til að gera mikið gagn, allt safnast sem saman kemur.

Jólaálfarnir eru þær Bjarney, Birna, Maí Sól og Aníta sem brostu sínu fegursta við þetta tilefni.