Meghan Markle heillar viðstadda hvar sem hún kemur, síðasta miðvikudag mætti hún ásamt eiginmanninum, Harry Bretaprinsi, á galaviðburð Cirque du Soleil í Royal Albert Hall.

Viðburðurinn var til styrktar samtökum Harry, Sentebale, sem styður við börn í Afríku, sem smituð eru af HIV veirunni.

Meghan var klædd í dökkbláan pallíettukjól hannaðan af Roland Mouret og sem fylgihlut valdi hún armband sem var áður í eigu Díönu prinsessu.  Þetta er ekki í fyrsta sinn sem Meghan ber armbandið, en hún bar það í fyrstu opinberu heimsókn sinni með Harry, þegar þau heimsóttu Sidney í Ástralíu í október.

Armbandið er gyllt og gullfallegt með bláum steinum í.

Líklegt er að skartgripir og stíll lafði Díönu heitinnar falli Meghan í geð, en í maí bar hún hring Díönu í brúðkaupsmóttöku sinni, en hann hefur hún borið nokkrum sinnum.