Sara Barðdal Þórisdóttir er ÍAK einkaþjálfari, heilsumarkþjálfi og stofnandi hiitfit.is. Hún hjálpar konum að verða heilsuhraustari og hamingjusamari í gegnum námskeið og þjálfanir á vegum hiitfit.is 

Í desember er jóladagatal á síðunni þar sem þú færð hugmyndir af stuttum og raunsæjum skrefum til þess að halda líkamlegri og andlegri heilsu í góðu jafnvægi fram að jólum – og inn í nýja árið.

Glugginn fyrir 7. desember bauð upp á áskorun:

HiiTFiT áskorun dagsins: Stattu upp á klukkutímafresti – teygðu úr þér, gakktu nokkur skref, taktu dansspor, hristu hendur og fætur – hvað sem er – brjóttu upp kyrrsetuna!

Af hverju? 

Eitt það mikilvægasta fyrir líkamlega heilsu er að hreyfa sig reglulega á ákveðinn hátt og helst þannig að þú takir á öllum líkamanum. En með löngum vinnudögum við skrifborð, tölvu- og símahangsi, lyftum, rúllustigum, bílum og þar fram eftir götunum erum við að hreyfa okkur mun minna og sjaldnar en við ættum að vera að gera. Langar kyrrsetur í fleiri klukkutíma í einu geta aukið líkurnar á alvarlegum heilsubrestum eins og hjartasjúkdómum, áunninni sykursýki og ákveðnum tegundum krabbameina en rannsóknir sýna að við mikla kyrrsetu aukast líkurnar á þessum kvillum um heil 34% hjá konum. Bara með því að standa upp og hreyfa þig reglulega í gegnum daginn geturðu minnkað líkurnar á þessum sjúkdómum – líka þó þú æfir og hreyfir þig reglulega í viku hverri.

En af hverju er það sem mikil og löng kyrrseta hefur svona slæm áhrif? Þegar þú situr eru stærstu vöðvar líkamans í hvíld sem þýðir að á sama tíma eru þeir ekki ná að vinna sykur úr blóðinu sem eykur líkurnar á áunninni sykursýki. Í þessari stöðu hríðfellur einnig virkni ákveðinna ensíma sem annars vinna á fitu í blóðinu svo góða kólestrólið (HDL) fellur með. Þetta getur því valdið aukinni hættu á hjartasjúkdómum.

Í dag skaltu því standa upp með jöfnu millibili og sjá hvort þér líði ekki aðeins öðruvísi í lok dags – ekki nóg með það að þú gerir líkamanum stóran greiða heldur léttir þetta lundina talsvert og eykur jafna orku yfir daginn.

– Stilltu vekjaraklukkuna á símanum þínum á klukkutímafresti fram til kvölds eða ef þú ert með heilsuúr, fáðu það til þess að pípa á þig á klukkutímafresti út daginn til að minna þig á!

Skrá má sig í jóladagatalið hér.