Ævar Þór Benediktsson, betur þekktur sem Ævar vísindamaður er tilnefndur til alþjóðlegu ALMA verðlaunanna, en þau eru minningarverðlaun sænska barnabókahöfundarsins ástsæla Astrid Lindgren (Astrid Lindgren Memorial Award).

Ævar Þór er tilnefndur fyrir lestrarátak Ævars vísindamanns, sem ,,promoter of reading“, eða ,,lestrarhvetjari.“ Að vonum er Ævar Þór ánægður með tilnefninguna og segir orðið lestrarhvetjari hér með orðið ofurhetjunafnið hans.

Sænska ríkið stofnaði til minningarverðlauna Astrid Lindgren árið 2002 og er um að ræða inhver stærstu verðlaun sem veitt eru á sviði barnabókmennta, verðlaunaféð nemur fimm milljónum sænskra króna. 246 einstaklingar frá 64 löndum eru tilnefndir og er Ævar Þór sá eini frá Íslandi.

Verðlaunin eru veitt einstaklingum og stofnunum sem hafa lagt sitt af mörkum til framgangs barna- og unglingabókmennta, tilkynnt verður um verðlaunahafa 2. Apríl 2019.

Ævar Þór var nýlega í viðtali hjá DV sem lesa má hér.