Meghan Markle hertogaynjan af Sussex og fyrrum leikkona var stödd á Íslandi ásamt vinum sínum þegar árið 2016 gekk í garð. Þetta voru seinustu áramótin hennar sem einhleyp kona en aðeins nokkrum mánuðum síðar hófst ástarsamband hennar og Harry Bretaprins.

Breski miðillinn Sunday Express og ástralski miðilinn Escape greina frá þessu. Hertogaynjan birti myndir úr Íslandsferðinni á Instagram síðu sem hún hélt úti á sínum tíma en hún hætti á samfélagsmiðlum eftir að hún giftist inn í bresku konungsfjölskylduna.

Fram kemur að Meghan hafi dvalið í Hafnarfirði á meðan hún var á Íslandi, líkt og meðfylgjandi ljósmynd sýnir. Við myndina ritaði hún að landið væri „svo fallegt og virkilega indælt líka. Algjörlega mín týpa.“

Áður en Meghan varð hertogaynjan af Sussex hélt hún úti lífsstílsblogginu The Tig þar sem hún skrifaði meðal annars um ferðalög sín um heiminn en hún ferðaðist til að mynda til Möltu, Spánar, Ítalíu og Grikklands.

Meghan er eini meðlimur bresku konungsfjölskyldunnar fyrir utan drottninguna sem hefur heimsótt Ísland. Elísabet Englandsdrottning kom í opinbera heimsókn til Íslands sumarið 1990.