Orðið á götunni er að aðkoma Friðjóns Friðjónssonar, fyrrum aðstoðarmanns Bjarna Benediktssonar, að framboði Katrínar Jakobsdóttur muni ekki auka fylgi hennar. Ekki frekar en stuðningur Hannesar Hólmsteins Gissurarsonar við framboðið. Mannlíf skýrir einnig frá því í gær að Svanhildur Hólm Valsdóttir, fyrrverandi aðstoðarmaður Bjarna Benediktssonar „sé virk í baklandi Katrínar.“
Bjarni er óvinsælasti stjórnmálamaður landsins samkvæmt öllum könnunum. Yfir 70 prósent landsmanna segjast ekki treysta honum fyrir embætti forsætisráðherra. Ástæðan er sú að hann hefur orðið uppvís að fjölmörgum spillingarmálum á ráðherraferli sínum. Á síðasta hausti hraktist Bjarni úr embætti fjármálaráðherra eftir alvarlegar ávirðingar Umboðsmanns Alþingis. Þá sagðist Bjarni ætla að „axla ábyrgð.“ Það gerði hann einungis með því að færa sig milli ráðherrastóla og gerðist utanríkisráðherra. Fjórum mánuðum síðar er hann orðinn forsætisráðherra eftir uppgjöf Katrínar Jakobsdóttur. Af því tilefni hafa 42 þúsund kjósendur á Íslandi samþykkt yfirlýsingu um að þeir treysti Bjarna ekki fyrir embættinu.
Rétt er að minna á að Svanhildur Hólm Valsdóttir, annar fyrrum aðstoðarmaður Bjarna, er sú vinkona Bjarna sem hann valdi í embætti sendiherra Íslands í Bandaríkjunum meðan hann var utanríkisráðherra. Hún hefur hvergi komið nærri störfum í utanríkisþjónustunni og útnefning hennar er vægast sagt umdeild – enn eitt dæmið um einkavinavæðingu og spillingu á vegum Bjarna.
Orðið á götunni er að það hljóti að vera vægast sagt vafasamt fyrir frambjóðanda til forseta að tengjast Bjarna með svo áberandi hætti sem hér um ræðir. Friðjón hefur komið að ýmsum verkum fyrir Sjálfstæðisflokkinn sem oftar en ekki hafa misheppnast. Eitt dæmi um það er þegar hann var sendur á kostnað stjórnarráðsins til að reyna að bjarga Hönnu Birnu Kristjánsdóttur úr þeirri klípu sem hún hafði komið sér í sem innanríkisráðherra vegna ósanninda sem ráðuneyti hennar hafði viðhaft við fjölmiðla vegna flóttamanns. Friðjón fór mikinn við að reyna að stýra atburðarásinni sem launaður ráðgjafi en árangurinn varð enginn. Hanna Birna hrökklaðist úr embætti og hefur ekki tekið þátt í stjórnmálastarfi á Íslandi síðan.
Samkvæmt skoðanakönnunum að undanförnu hefur Katrín einkum sótt fylgi sitt til sjálfstæðismanna – eins furðulegt og það nú er – og telur sig eflaust styrkja þá stöðu með því að hleypa þessu fólki nær sér í aðdraganda kosninganna. En þar misreiknar hún sig alvarlega. Orðið á götunni er að kjósendur sjái við þessu – en ekki verður aftur snúið úr þessu.
Uppfært kl.11.15: Í athugasemd frá Friðjóni sem barst ritstjórn segir hann það alrangt að hann hafi komið að lekamálinu svokallaða með áðurnefndum hætti.
„Hið sanna er að ég kom á vettvang daginn sem Hanna Birna sagði af sér með framkvæmdastjóra Sjálfstæðisflokksins sem vinagreiða við hann og var með í ráðum hvort flokkurinn sem slíkur þyrfti að bregðast við með einhverjum hætti. Það var öll aðkoma mín að lekamálinu. Það sem birt er í þessum orðrómi er lygi, uppspuni eða í besta falli skapandi misminni,“ skrifar Friðjón.
