Í Íslendingasögum er víða getið um útlenda berserki sem höfðingjar fluttu til landsins. Í Eyrbyggja sögu er sagt frá Svíunum Leikni og Halla sem Vermundur mjóvi í Bjarnarhöfn tók með sér til landsins. Þessir menn voru svo miklir kappar að Vermundur taldi sig eiga sigur vísan í valdatafli á Snæfellsnesi með þá í sínu liði.

Júróvisjón hefur um langt skeið verið flaggskip RÚV og notið gífurlegra vinsælda. Íslenska þjóðin hefur ávallt haft brennandi áhuga á keppninni allt frá því að Gleðibankinn ætlaði að sigra heiminn árið 1987. Fjölmargir tónlistarmenn hafa lagt land undir fót til að keppa í fjarlægum tónlistarhöllum. Gengi íslensku keppendanna hefur þó verið dapurlegt. Hver þátttakandinn á fætur öðrum hefur verið sendur heim eftir undanrásirnar og ekki náð inn í sjálf úrslitin. Eiginlega hafa menn gefist upp á því að finna einhverja sigurformúlu í þessari eyðimörk.

Útvarpsstjóri sem eitt sinn var lögreglustjóri leggur þó ekki árar í bát. Hann tilkynnti á dögunum að palestínskur söngvari frá Jerúsalem mundi taka þátt í undankeppni RÚV, Allir vita að pólitískir vindar blása þessum keppanda alla leið í úrslitin í Svíþjóð. Hann mun njóta gífurlegrar samúðar um alla Evrópu svo að loksins eiga Íslendingar raunhæfan möguleika á sigri. Vígreifur Palestínumaður veifar íslenskum fána og syngur um harm þjóðar sinnar á arabísku með tvö þúsund ára sorg í augunum. Þetta mun steinliggja. Útvarpsstjóri fylgir aldagamalli hefð og fær erlenda málaliða sér til fulltingis þegar þjóðarsóminn er í veði. Hann skipar sér í flokk Snorra goða, Vermundar mjóva og Njáls og fleiri valinkunnra gáfumanna í Íslandssögunni og fer inn í söguna sem maðurinn sem vann júróvisjón fyrir fjallkonuna.

Ekki er lengur ástæða til að taka palestínska fánann niður á Austurvelli. Hann er kominn til að vera í íslensku samfélagi.