Frans páfi, leiðtogi kaþólikka, segir að kórónuveirufaraldurinn sé svar náttúrunnar við loftlagshlýnun og fálæti mannsins við þeirri vá sem steðji að jörðinni.
„Við brugðumst ekki við þessum hamförum. Hver talar nú um eldana í Ástralíu, eða rekur minni til þess að hægt var að sigla yfir Norðupólinn fyrir 18 mánuðum þar sem jöklarnir höfðu bráðnað ? Hver talar nú um flóðin? Ég veit ekki hvort þetta sé hefnd náttúrunnar, en þetta er sannarlega svar náttúrunnar,“
var haft eftir páfanum í viðtali.
Francis páfi er 83 ára og hefur tvívegis verið greindur neikvæður í smitprófunum vegna Covid-19.
Hann segir að horfa þurfi sérstaklega til þeirra sem fátækir séu á slíkum tímum, og vildi að heimilislausir yrðu sendir í sóttkví á hótelum, en ekki á bílastæðum.
Hann varaði einnig við popúlískum pólitíkusum á vorum tímum, sem einblíndu á efnahagsáhrif kórónuveirunnar.
Hann taldi ræður sumra þeirra nú minna á ræður Hitlers árið 1933. Sagðist hann hafa áhyggjur af hræsni sumra stjórnmálamanna, sem töluðu um að bregðast þyrfti við ástandinu, og hungursneyð í heiminum, en væru um leið að framleiða vopn sjálfir.
