Sky hefur hafið harða herferð gegn ólöglegu sjónvarpsstreymi og sent hundruðum einstaklinga viðvörunarbréf vegna notkunar á svokölluðum „dodgy box“ og breyttum Amazon Fire Stick tækjum.

Bréfin hafa verið send til notenda á Írlandi og gefur Sky viðkomandi einstaklingum tvær vikur til að skriflega staðfesta að þeir muni hætta að streyma efni ólöglega. Ef þeir svara ekki eða halda áfram notkuninni gæti málið farið í lögfræðilegt ferli.

Málið kemur í kjölfar úrskurðar írskra dómstóla frá því í mars þar sem Sky fékk aðgang að nöfnum og heimilisföngum yfir 300 einstaklinga sem höfðu greitt fyrir ólöglegt IPTV-efni í gegnum Revolut.

Sky segir að um sé að ræða áskriftir að þjónustum sem veita aðgang að Sky-rásum og öðru sjónvarpsefni án löglegra áskrifta.

„Þetta er ólöglegt þar sem Sky á réttinn að þessu efni,“ sagði talsmaður fyrirtækisins við Irish Times.

Fyrirtækið hefur þegar sent fyrstu 200 viðvörunarbréfin og útilokar ekki frekari aðgerðir, þar á meðal skaðabótakröfur og innheimtu lögfræðikostnaðar.

Ólöglegt streymi á ensku úrvalsdeildinni og öðru íþróttaefni hefur aukist mikið undanfarin ár og sjónvarpsstöðvar hafa í auknum mæli reynt að stemma stigu við þróuninni.