Björn Ulvaeus úr hjómsveitinni ABBA lætur gagnrýnendur Gretu Thunberg aldeilis heyra það í stuttri vídeófærslu sem má meðal annars sjá hér á vef Irish Times.
Hann segir að staðreyndin sé sú að feðraveldið sé að pissa í buxurnar af ótta við sextán ára stelpu með ofurkrafta. Hún sé orðin að martröð popúlista.
„Hún segir að vísindi og upplýsing sé það sem við þurfum nú, ekki staðnaða þjóðrembu og samsæriskenningar. Ég held að sænski höfundurinn Astrid Lindgren hefði kunnað vel við Gretu. Hún er eins og blátt áfram, þrjósk og djúphugsandi Lína Langsokkur. Ef mér skjátlast ekki er birtist stillt kímnigáfa í því hvernig hún talar um gagnrýnendur sína – sem því miður eru mestanpart eldri menn eins og ég.“
Björn Ulvaeus segir að Greta geri sumt fólk alveg brjálað – aðallega karlmenn – hann segist eiga erfitt með að skilja hvaðan hún komi öll þessi reiði.
„Hvernig er hægt að leggjast svo lágt að gagnrýna útlit barns? Ungt fólk þarf fyrirmyndir og sem slík er Greta blessun í heimi þar sem vaða uppi áhrifavaldar og stjörnur í raunveruleikaþáttum. Henn er mikið niðri fyrir þegar hún segir að við þurfum vísindi til að milda afleiðingar loftslagsbreytinga. Svörin er ekki hægt að finna annars staðar. Jafnvel þótt maður telji ekki að allt sem Greta segir eða gerir sé rétt, hlýtur maður að dást að hugrekki hennar og einbeitingu.“
Í lokin segir hann að það sé ótrúlegt afrek að skapa alheimshreyfingu úr engu á svo stuttum tíma. Nú sé hægt að finna þrýsting frá milljónum ungs fóks sem ekki var þar áður. Þetta muni leiða til einhvers sem hefði ekki gerst ef hún hefði ekki byrjað skólaverkfall sitt fyrir utan sænska þingið.
