Jón Þór Ólafsson, þingmaður Pírata sem einnig er einn varaforseta í forsætisnefnd, stóð ekki að áliti nefndarinnar er hún staðfesti niðurstöður siðanefndar um brot Þórhildar Sunnu Ævarsdóttur á siðareglum þingmanna.
Hann segir segir í bókun sinni þann 24. janúar að Ásmundur Friðriksson hafi sannarlega brotið reglur, en skilaboðin sem forsætisnefnd sendi með þessu væru þau, að það teldist ekki siðbrot að fá meira greitt af almannafé en reglur heimili:
„Tilgangur siðareglnanna eru að koma í veg fyrir að þingmenn misnoti aðstöðu sína til að hygla sjálfum sér á kostnað almannahags. Það er staðreynd að Ásmundur Friðriksson fór ekki eftir reglum sem voru í gildi og bæði bað um og fékk meira greitt af almannafé en gildandi reglur sögðu til um. Þórhildur Sunna sagði þá staðreynd vekja rökstuddan grun um lögbrot af hálfu Ásmundar og kallaði eftir rannsókn á því hvort svo væri. Skilaboð meirihluta forsætisnefndar til þingmanna eru því skýr. Það að óska eftir og fá meira greitt af almanna fé en gildandi reglur heimila, er ekki siðabrot. Það að segja að slíkt skapi rökstuddan grun um brot sem þurfi að rannsaka, er siðabrot.“
Þá bætir Jón Þór við að með þessu hafi meirihluti forsætisnefndar snúið siðareglum þingmanna á haus:
„Skilaboð meirihluta forsætisnefndar til þingmanna eru því skýr. Það að óska eftir og fá meira greitt af almanna fé en gildandi reglur heimila, er ekki siðabrot. Það að segja að slíkt skapi rökstuddan grun um brot sem þurfi að rannsaka, er siðabrot. Ég get ekki lesið niðurstöðu meirihluta forsætisnefndar öðruvísi en svo að: ‘Sönn ummæli Þórhildar Sunnu um mögulega spillingu eru túlkuð sem siðabrot á Alþingi.’ Með þessu móti hefur meirihluti forsætisnefndar snúið siðareglum fyrir Alþingismenn á haus. Þessi afgreiðsla er til þess fallin að fela mögulega spillingu og þagga niðri í þeim sem vilja uppræta hana. Þessi afgreiðsla gengur gegn tilgangi siðareglnanna.“
Sjá einnig: Forsætisnefnd Alþingis fellst á álit siðanefndar um brot Þórhildar Sunnu
