Edda greinir frá þessu á Facebook-síðu sinni.
„Ein ROSALEGA fúl á móti!!,“ segir hún og bætir við að bíllinn hennar hafi skemmst þegar hún ók honum ofan í „mjööööög“ djúpa holu á Hverfisgötu í Hafnarfirði. Segir Edda að það hafi kostað „annan handlegginn“ að laga undirvagninn.
„Ég hafði að sjálfsögðu strax samband við Hafnarfjarðarbæ og þar könnuðust menn við að verktakar þeirra höfðu verið að saga sundur malbikið og laga holur og mér var sagt að fleiri fórnarlömb en ég hefðu lent illa í því á Hverfisgötunni,“ segir hún.
Edda segir að það sé daglegt brauð að bílstjórar aki holóttar götur eða götur þar sem viðgerðir standa yfir.
„En þegar maður ekur hægt og varlega verða sjaldnast skemmdir. Þessi hola sem búið var að saga þarna í Firðinum var amk. 20-30 cm djúp, ekkert merkt og alllir bílstjórar sem ég fylgdist með stoppuðu til að læðast yfir skurðinn – en allt kom fyrir ekki, það urðu greinilega skemmdir á fleiri bifreiðum en mínum,“ segir Edda og bætir við að Hafnarfjarðarbær hafi vísað á sitt tryggingafélag sem er VÍS og þar á bæ sé allra leiða leitað til að greiða ekki skaðann. „Vísa á einhverja úrskurðarnefnd þar sem maður þarf að greiða offjár fyrir að fá aðstoð,“ segir Edda.
Það er þó aldrei langt í húmorinn hjá henni og klykkir hún út með þessum orðum:
„Og nú ætla ég að senda öldruðu fullu frænku mína með fúlegg og gamla uppþvottabursta til að ná fram hefndum!!!“
