Hinn þjóðþekkti sjónvarpsmaður Egill Helgason gerir tilraun í nýrri Facebook-færslu til að lýsa eftir úri sem hann segist hafa týnt fyrir 20 árum. Birtir Egill mynd af úri sem hann segir svipa til týnda úrsins en úrið á myndinni er af tegund sem er verðlögð í hærri kantinum og því líklegt að týnda úrið hafi verið verðmætt. Egill gerir sér þó fulla grein fyrir að leitin að úrinu týnda sé líklega vonlítil svo löngu síðar. Hann segir svo frá:

„Það er kannski vonlítið og hallærislegt að lýsa eftir úri sem týndist fyrir næstum tveimur áratugum. En ég átti úr svipað þessu sem ég rakst á í búðarglugga í Massachusetts um daginn, líka með blárri skífu. Þetta er af gerðinni Ulysse Nardin og ekki alveg ódýrt. Einhvers staðar hlýtur það að hafa lent.“

Það liggur ekki fyrir hversu verðmætt úrið sem Egill týndi var. Í vefverslun Ulysse Nardin er lægsta uppgefna verð fyrir eitt af úrum fyrirtækisins 7.200 svissneskir frankar (um 1,1 milljón íslenskra króna.)

Færslu Egils með mynd af úri sem svipar til þess sem hann týndi fyrir 20 árum má sjá hér fyrir neðan.