Atlaga Sósíalistaflokksins að Alþingi geigaði að þessu sinni en flokkurinn hlýtur að óbreyttu um 3,8% fylgi. Leiðtogi flokksins, Sanna Magdalena Mörtudóttir, ætlar þó ekki að leggja árar í bát.

„Eins og ég sé stöðuna núna þá er það langhlaup að berjast gegn auðvaldsskipulaginu sem ræður hér ríkjum. Það tekur tíma, baráttu og þrek. Hugur minn er strax kominn í undirbúning sveitarstjórnarkosninga og von um sósíalíska uppbygginu þar,“ segir Sanna í færslu á Facebook.

Segir hún að hlutirnir séu ekki alltaf auðveldir en þegar svo fer, segir Sanna að þá er best að  halda áfram þar sem það er hægt.

„Það er meira en að segja það að vinna gegn kapítalískum einstaklingmiðuðum áherslum sem eru svo inngrónar inn í okkar samfélag en ég er glöð með þær áherslur sem við Sósíalistar lögðum fram um réttláta skattheimtu til að byggja hér upp gott velferðarsamfélag. Þó að kannanir séu einungis vísbendingar, þá voru þær að sýna stuðning við þær áherslur sem Sósíalistar lögðu fram og mér finnst mikilvægt að næstu dagar fari í að rýna stöðuna í samtali við félaga,“ segir Sanna og sendi félögum sínum þakkarkveðjur fyrir baráttuna.

„Ég er stolt af félögum mínum, mun draga djúpt inn andann og halda svo áfram að berjast fyrir réttlæti og jöfnuði þar sem ég get,“ segir Sanna.