Það er ljúft að geta hengt upp þvottinn úti á sumrin, þá örfáu daga sem veður er til á Íslandi. En að nota þvottaklemmur skemmir þvottinn, sem og að láta sum efni standa óvarin lengi úti.

Eins og segir í breska blaðinu The Mirror eru til betri leiðir til að vernda fatnað og lín en að hengja þau óvarin upp með klemmum í sumarsólinni.

Mælt er með því að sleppa þvottaklemmunum og nota í staðinn þvottarekka sem þvotturinn getur legið á.

„Varist að nota þvottaklemmur. Þær geta skilið eftir ljóta og varanlega þrýstibletti á viðkvæmu taui,“ segir í umfjölluninni, sem unnin var í samráði við sérfræðinga hjá Superdry. „Til að verja viðkvæm efni ætti að sleppa þvottaklemmum alfarið og passa upp á að skilja þau ekki eftir úti í vindi þar sem þau gætu fokið í burtu.“

Þá er bent á að sólin geri tau hvítt með tímanum, það er uppliti þau. Það sé gott fyrir suman þvott en ekki annan. Einnig hentar ekki að þurrka allan þvott úti lengi.

„Sum efni verða stíf ef þau eru þurrkuð úti, sérstaklega náttúruleg efni eins og bómull. Til að koma í veg fyrir þetta er gott að prófa að þurrka þau í svolitla stund úti en setja þau síðan í þurrkarann.“