Lögreglan á höfuðborgarsvæðinu stendur nú fyrir umfangsmiklum aðgerðum í umdæminu og utan þess vegna rökstudds gruns um mansal, peningaþvætti, brot á atvinnuréttindum útlendinga og gruns um skipulagða brotastarfsemi. Aðgerðirnar hófust fyrir hádegi og munu standa yfir fram eftir degi, en í þeim felst meðal annars að ráðist er í húsleitir á fjölmörgum stöðum.

Í tilkynningu frá lögreglu segir að aðgerðirnar eru unnar í samvinnu við lögregluliðin á Suðurlandi, Suðurnesjum og Norðurlandi eystra, embætti ríkislögreglustjóra, Tollgæsluna, Útlendingastofnun, Vinnumálastofnun, ASÍ, velferðarsvið Reykjavíkurborgar, barnaverndaryfirvöld í Reykjavík, Kópavogi og Hafnarfirði, félagsþjónustuna í Kópavogi og Hafnarfirði, heilbrigðiseftirlit Reykjavíkur, Slökkvilið höfuðborgarsvæðisins og Bjarkarhlíð.

Ekki er hægt að veita frekari upplýsingar að svo stöddu segir í tilkynningunni.

Vísir greinir frá að samkvæmt þeirra heimildum séu aðgerðirnar tengdar fyrirtækjunum Vy-þrif, Pho Víetnam og Wok On, sem eru í eigu Davíðs Viðarssonar.

Mbl.is greinir frá að á sjö­unda tug lög­reglu­manna að lág­marki komi að aðgerðunum sem eru í gangi á höfuðborg­ar­svæðinu, Suður­landi, Suður­nesj­um og Norður­landi eystra. Sam­kvæmt heim­ild­um mbl.is snúa aðgerðirn­ar að veit­inga­stöðum, gisti­heim­il­um og heim­il­um fólks.

Um er að ræða stærstu eða með þeim stærstu aðgerðum sem lögreglan hefur staðið í að sögn Elínar Agnesar Krist­ín­ar­dótt­ur, aðstoðar­yf­ir­lög­regluþjóns hjá rann­sókn­ar­sviði lög­regl­unn­ar á höfuðborg­ar­svæðinu. Ekki fæst gefið upp hvort einhver hafi verið handtekinn.

Veit­ingastöðum Wok On hefur verið lokað í aðgerðunum, sem og gisti­húsinu Kast­ali Gu­est­hou­se í miðbæ Reykjavíkur. Fram kemur á heimasíðu Wok On að allir staðir keðjunnar séu lokaðir.