Sænska ríkisútvarpið greinir frá því að Chalmers tækniháskólinn í Gautaborg hafi bannað allar mótmælasamkomur og veggspjöld sem fela í sér pólitísk mótmæli á lóð og í byggingum háskólans.

Bannið gildir fyrir hópa sem koma saman til að tjá pólitískar skoðanir á þann hátt að fólk sem á leið framhjá verði vart við skilaboðin.

Martin Nilsson Jacobi rektor skólans segir bannið sett á til að tryggja það að Chalmers verði staður þar sem hægt er að skiptast á hugmyndum og að þar sé rými fyrir ólík sjónarmið, skoðanir og blæbrigði. Hann segir háskólann verða að axla ábyrgð á því að standa vörð um slíkt.

Stúdentafélag Jafnaðarmannaflokksins hefur krafist þess að ákvörðunin verði dregin til baka. Það segir ákvörðun háskólans vera skaðlega fyrir lýðræðislega umræðu og einnig fyrir möguleika stúdenta á því að vera virkir þátttakendur í lýðræðisþjóðfélagi.

SVT ræðir við nemanda við Chalmers sem heitir Faezeh Mohammadi. Hún segist vera frá landi þar sem tjáningarfrelsi og frelsi til mótmæla sé ekki til staðar sem hafi skapað gríðarleg vandamál en hún hafi talið fram að þessu að þetta ætti ekki við um Svíþjóð.

Borið hefur á mótmælum í Chalmers og öðrum sænskum háskólum að undanförnu vegna stríðsástandsins fyrir botni Miðjarðarhafs.

Í háskólanum í Borås hefur lítill hópur nemenda gengið út úr tímum á hverjum þriðjudegi til að tjá skoðanir sínar á stríðinu milli Hamas og Ísraels. Matts Tinnsten, rektor skólans, segir að nemendurnir hafi upphaflega safnast saman í anddyri aðalbyggingar skólans en þeir hafi verið beðnir um að færa sig annað þar sem þeir hafi ekki tilkynnt mótmælin fyrirfram. Nemendurnir hafi eftir það safnast saman utan dyra á háskólasvæðinu. Háskólinn í Borås hefur hins vegar ekki lagt á bann við mótmælum eins og Chalmers tækniháskólinn.