Tobba er gestur vikunnar í Fókus, spjallþætti DV. Hún rak Granólabarinn um árabil í stamstarfi við móður sína, Guðbjörgu Birgis en mæðgurnar seldu staðinn nýlega. Aðdáendur safanna og sykurlausa gúmmelaðsins þurfa þó ekki að örvænta en mægðurnar hófu nýverið samstarf við veitingastaðinn Lemon.
Það er óhætt að segja að athafnakonan hafi gefið sig alla í staðinn. Hún keyrði sig út í vinnu og endaði í skurðaðgerð og með spelkur vegna álags. Hún útskýrir málið nánar í þættinum.
„Það var ótrúlega mikið að gera, ég var á djúsvélinni en strákurinn sem var djúsari hjá mér var í fríi. Ég leysti hann af á þessari blessuðu djúsvél, akkúrat í þeim mánuði þar sem var langmest að gera. Hefðum þurft að vera bæði á þessari bévítans djúsvél,“ segir Tobba kímin.
Hún segir að hún hafi ekki áttað sig á að verkirnir hafi tengst vinnunni, þar sem þeir komu aðeins fram á næturnar.
„Ég byrjaði að vakna á næturnar í sturluðum krampa og þá festist höndin [í kló]. Ég var föst í 20 mínútur með sturlaða taugaverki. Ég reyndi að fara í heitt bað og nudda höndina og var bara öskurgrenjandi í sturtu nótt eftir nótt. Það var ekkert sem ég gat gert fyrr en krampinn gekk yfir.“
Tobba fer yfir alla sólarsöguna í spilaranum hér að ofan, en hún endaði með að þurfa skurðaðgerð og er nýfarin að fá tilfinningu í fingurna aftur.
Hún ræðir nánar um granólaævintýrið, ADHD-greininguna og gönguna frá Frakklandi til Spánar í þættinum sem má horfa á í heild sinni hér. Einnig er hægt að hlusta á þáttinn á Spotify.
