Hvorki Bayern Munchen né Tottenham hafa gengið frá samningaborðinu þrátt fyrir að því sem kallað var “ lokatilboðið í Harry Kane“ hafi verið hafnað af Tottenham. Sky Sports greinir frá stöðu mála.

Tilboði Bayern upp á meira en 100 milljónir evra var hafnað af Tottenham. Hingað til hefur ekki verið talið að þýska félagið sé til í að bjóða meira í leikmanninn. Daniel Levy og æðstu menn Tottenham eru harðir í horn að taka þrátt fyrir að Kane eigi aðeins ár eftir af samningi sínum.

Bayern taldi tilboð sitt ansi gott og sanngjarnt en það dugði ekki til.

Kane vill fá framtíð sína á hreint sem fyrst og helst fyrir fyrsta leik Tottenham í ensku úrvalsdeildinni á sunnudag. Stór ástæða þess að hann vill fá hlutina á hreint er þá að eiginkona hans á von á barni eftir um tvær vikur og má ekki ferðast lengur.

Kane hefur verið stórkostlegur fyrir Tottenham í áraraðir og skoraði til að mynda 30 mörk í ensku úrvalsdeildinni á síðustu leiktíð.