Ekstra Bladet í Danmörku sagði fyrr í dag frá máli sem upp kom þar í landi í gær, mánudag.

Karlmaður á níræðisaldri sat í mestu makindum, um hádegisbilið, í sófa í stofunni á heimili sínu sem er um þrjá kílómetra fyrir norðan þorpið Flauenskjold á Norður-Jótlandi.

Skyndilega birtist maður á stofugólfinu sem húsráðandinn hafði aldrei séð áður. Líklegt er talið að útidyrahurðin hafi verið ólæst og hinn ókunnugi maður því átt auðvelt með inngöngu í húsið.

Hinn óboðni gestur beindi afsagaðri haglabyssu að gamla manninum og krafðist þess hástöfum að hann myndi afhenda alla peningana sína.

Sá gamli var hins vegar ekki tilbúinn til að gefast svo auðveldlega upp. Hann stóð upp úr sófanum og réðst á manninn með byssuna. Upphófust þá slagsmál og náði innbrotsþjófurinn að hrinda gamla manninum í gólfið. Við svo búið náði þjófurinn að stela bíllyklum mannsins en virðist að því loknu hafa hætt við allt saman. Þjófurinn yfirgaf húsið án þess að taka bílinn og stal raunar engu öðru frá gamla manninum en bíllyklunum.

Húsráðandinn hlaut nokkrar skrámur á öðrum handleggnum eftir að þjófurinn náði að hrinda honum í gólfið. Hann meiddist að öðru leyti ekki en var mjög brugðið.

Lögreglan á svæðinu óskar eftir aðstoð almennings við að hafa hendur í hári þjófsins. Samkvæmt lýsingu húsráðandans er þjófurinn á aldrinum 20-25 ára, 190 sentímetrar á hæð, ljós á hörund og hann talar dönsku en ekki með erlendum hreim. Þjófurinn var klæddur í dökk föt og með dökka derhúfu á höfðinu.