Erna Solberg, leiðtogi Hægriflokksins og í Noregi og fyrrverandi forsætisráðherra landsins, sagði í morgun á Facebook-síðu sinni frá heimsókn sem hún fór í á hjúkrunarheimilinu Garður Ingiríðar drottningar í Osló.

Hjúkrunarheimilið er nýtt og sérstaklega hugsað fyrir fólk með elliglöp.

Solberg segir hjúkrunarheimilið afsprengi ákvörðunar sem tekin hafi verið að áeggjan borgarstjórnar Osló fyrir 9 árum um að byggja hjúkrunarheimili fyrir fólk með elliglöp á nýjan hátt.

Hjúkrunarheimilið er í raun eins og lítið þorp með kaffihús, bar, menningarhús, verkstæði og brugghús. Hún segir að nægt rými sé til staðar á heimilinu fyrir íbúana til að njóta frelsis og fjölbreytni en þeir geti verið öruggir innan veggja heimilsins á sama tíma.

Aðstandendur íbúa hafa fullt frelsi til að taka þátt í starfinu sem fer fram á heimilinu og geta jafnvel sest niður og tekið því rólega með t.d. góða bók. Sjálfboðaliðar eru einnig boðnir velkomnir ef þeir hafa áhuga á að skipuleggja t.d. grillveislur, dansiböll eða samsöng.

Solberg kallar Garð Ingiríðar drottningar þorp fyrir fólk með elliglöp og segir það og sambærilegt þorp í Bærum, sem heitir Carpe Diem, létti þeim lífið sem greinst hafa með elliglöp. Þetta séu ekki eingöngu dvalarstaðir heldur heimili þar sem hægt sé að halda áfram með lífið eftir slíka greiningu.

Hún segir að á næstu árum muni þörfin fyrir húsnæðiskosti af þessu tagi fara vaxandi fyrir fólk með elliglöp því þetta sé lausn sem henti sérstaklega vel fyrir það fólk í þessum hópi sem glímir að öðru leyti ekki við líkamlega vanheilsu sem krefst sértækrar aðstoðar. Þorpin ýti undir bæði líkamlega og andlega virkni sem sé þessum hópi nauðsynleg.