AP hefur eftir ónafngreindum heimildarmönnum að meðal þess sem reiknað er með að verði í pakkanum séu 100 brynvarin ökutæki af gerðinni Stryker og að minnsta kosti 50 brynvarðir Bradley beltabílar.
Þessi ökutæki munu gera úkraínskum hermönnum kleift að hreyfa sig hraðar og öruggar um við víglínurnar.
Stjórn Joe Biden á eftir að leggja blessun sína yfir pakkann og því gæti innihald hans breyst.
Bretar tilkynntu nýlega að þeir ætli að senda Úkraínumönnum 12 Challenger 2 skriðdreka. Úkraínumenn hafa ítrekað beðið um skriðdreka en hik hefur verið á Vesturlöndum hvað það varðar en það hik er nú væntanlega úr sögunni með ákvörðun Breta. Mikill þrýstingur er nú á þýsku ríkisstjórnina um að heimila afhendingu Leopard skriðdreka til Úkraínumanna en bæði Finnar og Pólverjar hafa lýst sig reiðubúna til að senda þeim slíka skriðdreka. Þjóðverjar þurfa að gefa grænt ljós á það þar sem um þýska skriðdreka er að ræða.
