Einn af fylgifiskum COVID-19 er að margir hafa misst bragð- og lyktarskynið. Hjá sumum varði þetta aðeins í nokkra daga en hjá öðrum mánuðum saman. Það hefur verið mikil ráðgáta hvað veldur þessu en nú telur hópur vísindamanna sig hafa fundið ástæðuna fyrir þessu.

Að sögn The Guardian telja vísindamennirnir að ástæðan sé að sumir séu með óvenjuleg ónæmisviðbrögð sem eyðileggi í raun frumur í nefinu. Þeir komust að þessari niðurstöðu með því að rannsaka sýni úr nösum fjölda sjúklinga.

Niðurstaða rannsóknarinnar er að þeir sem áttu í langvarandi vanda með lyktarskynið eru með ónæmisfrumur í slímhimnu nefsins, sem brugðust óvenjulega við smiti og gátu eyðilagt mikilvægar taugafrumur.

Rannsóknin leiddi einnig í ljós að frumurnar brugðust við á sama hátt þrátt fyrir að sjúkdómurinn væri afstaðinn.

Bradley Goldstein, lektor í taugalíffræði við Duke University í Norður-Karólínu, vann að rannsókninni. Hann hefur látið hafa eftir sér að þessi óvenjulegu ónæmisviðbrögð frumanna geti hugsanlega skýrt fleiri langvarandi einkenni sem leggjast á COVID-19-sjúklinga.

Talið er að um 15 milljónir manna, á heimsvísu, hafi misst lyktarskynið um langa hríð í tengslum við COVID-19.

Science Translational Medicine segir að rannsóknin geti hjálpað til við að ryðja brautina fyrir nýjar tegundir meðferða fyrir þá sem missa lyktarskynið.