Daily Mail og Sky News skýra frá þessu. Fram kemur að veiran hafi fundist í tveimur manneskjum sem komu nýlega til Englands frá vestanverðri Afríku. Fólkið er úr sömu fjölskyldu og býr í austurhluta Englands að sögn heilbrigðisyfirvalda.
Grunur leikur á að þriðja manneskjan sé einnig smituð af veirunni en beðið er eftir niðurstöðum úr rannsókn á sýni úr viðkomandi.
Annar, þeirra sem smit hefur verið staðfest hjá, hefur náð sér að fullu en hinn hefur verið fluttur á Royal Free London NHS Foundation Trust til að fá sérstaka meðferð þar. Sá sem bíður niðurstöðu sýnatöku er undir eftirliti hjá Bedfordshire Hospitals NHS Foundation Trust.
Lassa hiti er landlægur í Nígeríu og fleiri löndum í vestanverðri Afríku, til dæmis Líberíu og Gíneu. Fyrstu einkenni smits eru höfuðverkur, hálsbólga og uppköst. Veiran getur einnig valdið blæðingum úr munni, nösum og leggöngum. Einkennin færast síðan í vöxt og færast yfir í krampa, skjálfta, skerta meðvitund og á endanum meðvitundarleysi ef viðkomandi fær ekki nauðsynlega aðhlynningu fljótt. Daily Mail segir að fjórðungur smitaðra missi einnig heyrn tímabundið.
Flestir ná sér af veikinni en þó ekki allir en dánarhlutfallið er um 1%.
Líklegt þykir að fólk smitist í gegnum mat eða með því að snerta yfirborð flata sem þvag hefur lent á eða af rottum. Líkamsvökvar geta einnig borið smit með sér.
Fram að þessu höfðu aðeins átta tilfelli Lassa hita greinst í Bretlandi síðan 1980. Tvö síðustu tilfellin greindust 2009
