Þýska lögreglan hefur frá því í júní 2020 unnið að rannsókn á tengslum þýska barnaníðingsins Christian B. við hvarf Madeleine McCann úr sumarleyfisíbúð í Portúgal í maí 2007. Lögreglan er sannfærð um að Christian B. hafi verið viðriðinn hvarf hennar og hefur sagt að hann hafi myrt hana. En hann hefur ekki enn verið ákærður fyrir aðild að málinu. En nú eru ný og óvænt tíðindi í málinu.

Það er hópur, sem vinnur að gerð heimildarmyndar um hvarf Madeleine, sem hefur afhent lögreglunni ný gögn. Segja þáttagerðarmennirnir að þeir hafi sannanir fyrir því að Christian B. hafi verið nærri Praia da Luz þegar Madeleine hvarf að kvöldi til á meðan foreldrar hennar sátu að snæðingi á nærliggjandi veitingastað.

Það eru þáttagerðarmenn á vegum þýsku sjónvarpsstöðvarinnar Sat 1 sem segjast hafa aflað „margra nýrra vísbendinga“ við gerð myndarinnar. Vísbendingar sem tengi Christian B. við málið. Það eru bæði fréttamenn og fyrrum lögreglumenn sem koma að gerð heimildarmyndarinnar.

Juliane Ebling, aðalritstjóri hjá Sat 1, sagði í samtali við The Sun að mál Madeleine tengist Þýskalandi á marga vegu. Réttað verði í málinu þar í landi og hinn grunaði sé Þjóðverji. Hún sagði að Jutta Rabe, rannsóknarblaðamaður, hafi rannsakað „skelfileg gögn“ í Þýskalandi, Portúgal og Englandi á síðustu mánuðum, gögn sem tengi Christian B. við málið.

Sat 1 hefur ekki viljað skýra frá eðli þessara „skelfilegu sönnunargagna“ og segir að skýrt verði frá þeim í heimildarmyndinni þegar hún verður sýnd en ekki hefur verið ákveðið hvenær það verður.

Christian B. afplánar nú sjö ára fangelsisdóm fyrir að hafa nauðgað 72 ára bandarískri konu í Portúgal 2005. Lögreglan rannsakar einnig hugsanleg tengsl hans við þrjú önnur mál. Eitt þeirra snýst um nauðgun á írskri konu í Portúgal 2004, annað um kynferðisbrot gegn 10 ára stúlku í Portúgal 2007 og það þriðja um kynferðisbrot gegn fjórum börnum á hátíð í Sao Bartolomeu de Messines 2017.

Lögmaður Christian B. segir að skjólstæðingur hans neiti allri aðild að máli Madeleine McCann.