Á þessu ári má reikna með að 600 íbúðir, sem teljast til sértækra aðgerða á húsnæðismarkaði, komi inn á markaðinn. Þetta er um þriðjungur þeirra íbúða sem reikna má með að verði í boði á árinu. Þetta kemur fram í talningu sem GAMMA gerði síðasta sumar.

Markaður Fréttablaðsins skýrir frá þessu. Haft er eftir Unu Jónsdóttur, hagfræðingi hjá Landsbankanum, að aðgerðir stjórnvalda til aðstoðar þeim sem eru að kaupa í fyrsta sinn auk vaxtalækkana hafi auðveldað kaup á íbúð. Því sé óvíst hver eftirspurnin er og verður eftir leiguhúsnæði.

Með sértækum úrræðum er átt við félagslegar íbúðir, stúdentaíbúðir, íbúðir á vegum leigufélagsins Bjargs og íbúðir í átaksverkefni Reykjavíkurborgar um hagkvæmt húsnæði fyrir ungt fólk.

Samkvæmt talningunni þá teljast um 63% íbúða, sem framkvæmdir hófust við í Reykjavík á tólf mánaða tímabili fyrir talninguna, til sértækra úrræða.

Una benti á að spenna á fasteignamarkaði geti aukist á nýjan leik þegar ferðamenn byrja aftur að streyma til landsins. „Þá verður mikilvægt að hafa valkost fyrir tekjulægri hópa sem kjósa að vera á leigumarkaði,“ sagði hún.