Sektir eða fangelsisdómar geta legið við að brjóta vísvitandi gegn sóttkví og stofna þannig almannaheill í hættu. Einnig getur sóttvarnalæknir fengið lögregluna til að vista ósamvinnuþýða í einangrun gegn vilja þeirra.

Fréttablaðið skýrir frá þessu í dag og hefur eftir Jóni Þór Ólasyni, lögmanni og lektor við lagadeild Háskóla Íslands.

„Ef einstaklingur er með sjúkdóm og vill ekki gera neitt til að hefta útbreiðslu smitunar, og almannahagsmunir liggja undir, getur sóttvarnalæknir leit að aðstoðar lögregluyfirvalda.“

Er haft eftir honum.

Einnig kemur fram að sóttvarnalæknir geti ákveðið að einstaklingur, semn neitar að vera í sóttkví, verði settur í sóttkví á sjúkrahúsi eða með öðrum hætti. Þolandinn getur borið slíka ákvörðun undir héraðsdóm.

Í hegningarlögunum kemur fram að hver sá sem veldur hættu á útbreiðslu næms sjúkdóms með því að brjóta gegn fyrirmælum laga eða varúðarreglum geti átt allt að þriggja ára fangelsi yfir höfði sér. Refsingin getur orðið allt að sex ára fangelsi ef um sjúkdóm er að ræða sem hið opinbera gerir sérstakar ráðstafanir til að hefta. Í sóttvarnalögum liggja sektir og allt að þriggja mánaða fangelsi við þessu.

Jón Þór benti á að það skipti máli varðandi refsiþyngdina hvort um ásetning eða gáleysi sé að ræða.