Fjórir eru látnir eftir að skotbardagi braust út á milli lögreglu og manna sem grunaðir eru um rán. Myndbönd af skotbardaga lögreglu við ræningjana hafa nú verið birt og er óhætt að segja að þau séu hrollvekjandi.

Atburðarásin hófst síðdegis í gær tveir menn reyndu að ræna skartgripaverslun í Coral Gables í Flórída í Bandaríkjunum. Starfsmanni tókst að gera lögreglu viðvart með þjófavarnakerfi verslunarinnar og þegar lögregla kom á vettvang eru mennirnir sagðir hafa beitt skotvopnum gegn lögreglu.

Mönnunum tókst að flýja í jeppabifreið, áður en þeir stálu bíl frá UPS-flutningafyrirtækinu og óku burt með ökumanninn, starfsmann UPS, enn í bílnum. Lögregla veitti bílnum eftirför en á myndböndum má sjá þegar flutningabíllinn ekur á ofsahraða og ítrekað gegn rauðu ljósi.

Lögreglu tókst loksins að stöðva för bílsins á fjölfarinni götu en mennirnir sem voru í bílnum drógu þá upp skotvopn og skutu að lögreglu. Lögregla svaraði í sömu mynt með þeim afleiðingum að ræningjarnir tveir létust, bílstjóri UPS-flutningabílsins og vegfarandi sem varð fyrir byssukúlu.