Starfsmenn hjá Vinnueftirlitinu sem kvörtuðu undan framkomu mannauðsráðgjafa í harðorðu bréfi voru skikkaðir til að fara í viðtöl hjá sálfræðingi sem hvatti þá til að draga bréfið til baka. Þetta kemur fram í Fréttablaðinu í dag. Mannauðsfulltrúi og ráðgjafi frá fyrirtækinu Attentus olli ólgu meðal starfsmanna ekki síst eftir að hann lét þau ummæli falla að ef þeir hættu störfum hjá stofnuninni myndu þeir hvergi fá vinnu annars staðar.
Sálfræðiviðtölin virðast hafa verið liður í því að fá starfsmenn til að draga mótmæli sín til baka. Hinn umdeildi mannauðsráðgjafi var þó látinn hætta.
Starfsandi hjá Vinnueftirlitinu hefur verið mjög slæmur undanfarið. Hefur Fréttablaðið fjalla um þau mál undanfarið. DV fékk í hendur nafnlaust bréf þar sem fullyrt er að forstjóri Vinnueftirlitsisn, Hanna Sigríður Gunnsteinsdóttir, beiti ógnarstjórnun og hafi starfsandi versnað mjög í tíð hennar en hún var ráðin fyrir tæpu ári.
Í svörum til Fréttablaðsins hefur Hanna viðurkennt að vandamál séu til staðar en sagt að óánægjan sé að miklu leyti til komin vegna umdeildra skipulagsbreytinga.