Heimildarmyndin Leaving Neverland hefur heldur betur hreyft við fólki en í henni lýsa James Safechuck og Wade Robson kynferðislegu ofbeldi sem þeir þurftu að þola af hendi poppkóngsins sáluga Michael Jackson.
Meðal þess sem James talar um í myndinni er sýndarbrúðkaup þar sem Michael keypti handa honum giftingarhring og þeir gengu í sýndarhjónaband. James á hringinn enn þá og sýnir hann í Leaving Neverland. Nú hafa hins vegar myndbönd komist í umferð á internetinu sem sýna þegar Michael og James rölta um skartgripabúð. Margir telja að þeir séu að kaupa umræddan hring.
Sjá einnig: Michael Jackson giftist drengnum í sýndarbrúðkaupi og veitti skartgripi fyrir kynlíf.
Í myndböndunum sést að poppkóngurinn er í dulargervi; með hatt, hárkollu, yfirvararskegg og falskar tennur. Öryggisvörðum fannst þetta dulargervi skrýtið sem varð til þess að upptakan var send til fjölmiðla, sem fjölluðu um verslunarferðina á sínum tíma, árið 1989.
Í fréttum var því haldið fram að Michael Jackson ætlaði að biðja söngkonunnar Sheryl Crow, sem söng bakraddir fyrir hann á þessum tíma. Eftir að myndin Leaving Neverland var sýnd telja hins vegar margir að um sé að ræða kaup á giftingarhring fyrir barnungan James.
Eins og áður segir á James hringinn enn þá og sýnir hann í Leaving Neverland. Hann segir í myndinni að poppkóngurinn hafi verðlaunað hann með skartgripum.
„Hann verðlaunaði mig með skartgripum fyrir að gera kynferðislega hluti með honum,“ segir hann og bætir við að hann hafi oft farið með Michael í skartgripabúðir að kaupa hringa. Þeir þurftu hins vegar alltaf að láta eins og þeir væru að kaupa þá fyrir konur.
„En við þóttumst máta hringa á litlu fingurnar mína til að láta eins og þeir væru jafnstórir og konunnar sem við vorum að kaupa fyrir.“
