Fyrr í þessum mánuð gaf HBO út kitlu fyrir áttundu þáttaröð Game of Thrones þar sem sjá má Jon Snow, Sansa Stark og Arya Stark.

Kitlan vakti eftirvæntingu og spenning hjá hinum fjölmörgu aðdáendum GOT sem bíða spenntir eftir þáttaröðinni, sem verður sú síðasta. Fjölmargar getgátur voru uppi um stytturnar sem sjást í kitlunni, mismunandi ásigkomulag þeirra og hvað þetta táknaði allt saman.

En nú er komið í ljós að kitlan hafði ekkert með þáttaröðina að gera.

Aðdáendasíða GOT, Winter Is Coming, benti á að Sophie Turner, sem leikur Sansa, hefði sagt á Coming Con ráðstefnunni í október síðastliðnum að atriði í komandi kitlu væru ótengd komandi þáttum.

„Við gerðum kitlu fyrir þáttaröð átta þar sem, ég veit ekki einu sinni hvort ég má segja frá þessu. En nei, hún hefur ekkert með þættina að gera, þetta er bara kynning. Það er stór stytta af mér, af Sansa og mig langaði eiginlega að hafa hana í garðinum í nýja heimilinu mínu. En þeir senda ekki frá Belfast til New York þannig að….“

Þetta er ekki í fyrsta sinn sem HBO platar aðdáendur þáttanna því fyrir þáttaröð sex birtist stikla sem sýndi andlit aðalpersónanna í Hall of Faces, sem hefði aðeins getað átt sér stað hefðu þær látist. Atriðið birtist ekki í neinum þáttanna.