„Ég vissi frá upphafi að hann væri öðruvísi, hann sýndi mér virðingu og fékk mig til að hlæja,“ segir Gomes. „Hann fær mig enn til að hlæja. Enginn annar gerir það. Við vissum frá byrjun að við værum ætluð hvort öðru.“
Fljótlega kom í ljós að þau áttu fleira sameiginlegt.
„Við vissum strax að við áttum sama afmælisdag,“ segir Gomes. „Síðar kom í ljós að við erum fædd á sama spítala.“
Bæði eru þau fædd 28. apríl 1990 á Morton spítalanum í Taunton, Masachusetts. Og ekki nóg með það, heldur eru þau einu börnin sem fæddust á spítalanum þann dag. Það staðfestir blaðaúrklippa sem amma Gomes hefur alltaf haldið upp á.
„Ég trúði honum ekki fyrst þegar hann sagðist eiga afmæli sama dag og ég og hélt að hann væri bara að reyna að heilla mig.“ Þau voru þó fljót að taka upp skilríkin þegar þau hittust fyrst.
Bairos bað Gomes í nóvember árið 2015 meðan þau voru á göngu í gegnum almenningsgarðinn í Boston. Hann bað fjölskyldu þeirra og vini að fela sig víðs vegar um garðinn til að koma henni á óvart. Hún sagði já og þau giftu sig 9. september síðastliðinn í sömu kirkju og fimm ættliðir Gomes fjölskyldunnar hafa gift sig í.
Foreldrar þeirra hafa skemmt sér yfir sögu barna þeirra. „Foreldrum okkar finnst þetta alveg mega fyndið,“ segir hún „og þau vissu að þetta var eitthvað alveg sérstakt.“
„Við erum enn að venjast því að vera hjón, en þetta hefur verið frábært hingað til,“ segir Gomes. „Við vonum að okkar saga fái fólk til að brosa og gleðjast, af því heimurinn þarf á því að halda.“
