Lungnakrabbamein leggst yfirleitt á eldra fólk og sérstaklega reykingafólk. En samkvæmt upplýsingum frá USC Norris Comprehensive Cance Center þá hefur tilfellum lungnakrabbameins hjá fólki sem reykir ekki og er yngra en 50 ára farið fjölgandi, sérstaklega hjá konum.

Á sama tíma hefur lungnakrabbameinstilfellum farið fækkandi í Bandaríkjunum síðan á níunda áratugnum. Ástæðan er að færri reykja en áður.

Þessi nýja þróun hefur því orðið til þess að vísindamenn hafa sperrt upp augun og hafist handa við að rannsaka hvað veldur þessu.

Í nýrri rannsókn, sem var birt í vísindaritinu SciTechDaily, tóku 187 sjúklingar þátt. Flestir þeirra höfðu aldrei reykt og lungnakrabbameinið hjá þeim var öðruvísi en það sem leggst yfirleitt á reykingafólk.

Vísindamennirnir rannsökuðu mataræði þátttakendanna og notuðust við stigakerfi þegar þeir lögðu mat á það. Í ljós kom að mataræði ungu sjúklinganna var almennt hollara en mataræði Bandaríkjamanna er að meðaltali.

Þeir borðuðu meira af ávöxtum, grænmeti og grófu korni. Konurnar, sem tóku þátt í rannsókninni, fengu flest stig.

Upplýsingar um mataræði þátttakendanna byggðust á svörum þeirra um mataræði og lífsstíl.

Vísindamennirnir telja að umhverfisáhrif geti hugsanlega skýrt þetta og benda sérstaklega á skordýraeitur í matvælum en það er oft matvælum sem eru ræktuð á hefðbundinn hátt.

Fyrri rannsóknir hafa sýnt að fólk, sem er í mikilli snertingu við skordýraeitur, eins og þeir sem starfa við landbúnað, fá oftar lungnakrabbamein en aðrir.

Það er í sjálfu sér ekki hollur matur sem er vandamálið, heldur geta eiturefni í umhverfinu í kringum matvælin leikið hlutverk hvað varðar lungnakrabbamein hjá ungu fólki sem reykir ekki.