Hrúturinn hefur montið yfirbragð, en færi betur að sýna minna af því, þar sem hann er stöðugt að reka hornin í allt.
Hrúturinn segir sjaldnast eitt og gerir annað. Hann gerir yfirleitt það sem er rangt og ræðir það svo ekki meira. Aldrei benda Hrútnum á það, nema þú viljir sjá nýrun á þér dregin út um ennisholurnar. Hrúturinn elskar Fiskinn vegna þess að hann heldur Hrútnum á jörðinni.
Hvort sem Hrúturinn býr í þakíbúð í Skuggahverfinu eða í tjaldi í Laugardal mun hann halda því fram til dauðadags að það sé akkúrat hlutskiptið sem hann valdi sér.
Hrúturinn fæðist ekki, hann einfaldlega poppar út úr móðurkviði, jafnvel á hjólaskautum.
Hrúturinn tekur ákvarðanir um líf sitt strax sem ungabarn. Hrúturinn giftist nokkrum sinnum, svona upp á grínið, en skilur aldrei. Makar þeirra falla bara frá. Guð er líklega í Hrútsmerkinu, Skrattinn er þá Vatnsberi.
Hrúturinn er alltaf í stjórnendastöðu. Ef hann væri settur í að þrífa salerni, myndi hann stofna félag einn og sér og fara síðan og mótmæla út á bílastæði. Hrútar halda allir að þeir séu Gvendur jaki. Fólk hleypur í burtu þegar Hrúturinn mætir á svæðið. Þau vita að ef þau gera það ekki, þá mun Hrúturinn trylla þau. Hrúturinn hatar að hlusta á Sporðdrekann tala vegna þess að Hrúturinn stærir sig af því að vera enn meira upptekinn af sjálfum sér. Sporðdrekanum til mikils ama, þá er Hrúturinn mesti skíthællinn af öllum stjörnumerkjunum. Hornin á honum eru alltaf í koppi annarra.
